Die Dorfschelle

Nummer 4 - Ausgabe April 1987

Was e Glick

De Winter war jo arig lang
un hatt' aach ziemlich Frost.
Er is uns uf die Nerve gang
un hot viel Geld gekost.

Solang mer sich besinne duht,
wars selte mol so kalt.
Es war e bitterbeese Zeit
for jung un ach for alt.

Ball 20 Grad wars unner Null,
so mancher hot gezittert.
un Eis un Schnee war uf der Stroß,
die Autos sin geschlittert.

Jetzt werds jo doch mol annerschter,
des Thermometer steiht,
un die Knospe werre dick.
Es werd aach langsam Zeit.

Mer heert die Veel schon zwitschere,
die Sunn krieht langsam Kraft.
Iwwerall do werds jetzt grie.
Ich glaab, mer hons geschafft.

Albert Hey