Die Dorfschelle

Nummer 9 - Ausgabe Dezember 1989

Weihnachte

Weihnachte is aach nit meh das, was es emol war un eigentlich sei sollt. Do werd mer sicher mancher recht gewe.

Schee war Weihnachte, wie mer sich iwwer Klonigkeite noch hot freie könne, wo mer noch dankbar un froh war, wammer satt se esse hatt'. Mer war ofach sefridde domols un dem Jesus Kind noch viel näher als wie heit. Unser schee, alt Weihnachtsfescht hon se umgekrempelt un e Geschäft draus gemacht mit Rummel un Glitzerkram.

Das hot ball nix meh se duh mit dem Kind in der Kripp. Jeder is sich heit selbst der Nächste, des Herz is dabei uf der Streck geblebb. Un "Friede auf Erden" kammer getrost vergesse, iwwerall herrsche Neid un Missgunscht, Krieg, Mord un Dootschlag. Milliarde werre ausgeb for Rakete un Panzer, gleichzeitig duh jeden Daach uf der Welt Mensche verhungere.

Na, Weihnachte is werklich nit meh das, was es emol war.

Albert Hey