Die Dorfschelle

Nummer 9 - Ausgabe Dezember 1989

E Chronik vumm Wingertspritze

Wann mer zurick denkt, ungefähr 90 Johr,
do sein die Traube kaputt gang, un ware net verfror.
Vun 1896 - 1903 sein in Aschbissem un in de Weinorte iwerall
no de Blied die Traube krank wor un abgefall.

Do is noch koner im Ertche schaffe gang,
all muschte se sich in de Wingertcher quele,
unn im Herbscht honse dann und wann.
ne paar Rappe geholt, mer konnt se zehle.

1902 muß ich hier erwehne, do gabs noch ko Auto, ko Fahrrad, ko Bus,
do ginge die Aschbissemer de Gensinger Weg e nunner an die Bohn zu Fuß.
Am Gensinger Weg e nunner harre die Horrweilerer merschtens Portugieser,
do gabs dann oft, wann se reif ware, Langfinger und Genießer.

1902 war vun Horrweiler de Christian Kern gewitzt,
er hot die ganzAußereih mit Kalk bespritscht.
Do sare viele, der spinnt im Hern,
es es war die Christian Kern.

Doch im Herbscht ware, wies des Lewe halt will,
die Neider und Spötter im Ertche ware ganz still.
Sie ginge eftersch an an sei Reih unn wollte gar net mer fort,
de Kern hat an de Außereih die schenschte Traube im Ort.

Dann besorchte die Gebrider Espenschied das Vitriol herbei,
unn so beganne 1903 die Erschte in Horrweiler mit de Spritzerei.
Vun Ofang hot jeder gespitscht, gelacht un gelauert
un so hots garnet all so lang gedauert.

Es iss vegang bald noch koo Johr,
des spritze met ner Rickehandjuckelspritz war geboor
Ne paar hon noch gewat un e bisje gehehnt,
e Johr sperer honse sich beim Nochber schun ogelehnt.

Vitriol-Kalkbrie war des Präparat zum Spritze,
alls emol gabs Probleme, das sein ko Witze.
Vel Arwet gabs mem Löschkalk vorsebereide,
met Bittcher, Oomer und Säckelcher, aach aus Seide.

Ime klone Bittche muscht mern waaische, wan mer bedenkt,
des Vitriol hot mer im‘me Säckelche ins anner Bittche gehängt.
Des Lesche un des Waaische dauert ungefähr e Tag un e Naacht,
dann hot mer die zwa Sache sesame ins Spritzfaß gemacht.

Im Spritzfaß hot mer dann met Staniolpapier proweert,
ist die Spritzbrie in Ordnung unn und nix verkeehrt.
Wenns Staniolbabier dann rot woor is, waars was genau‘s,
dann konnts enaus geh, mit Mann und Maus.

Kame awwer Wolke an de Himmel, dann gabs Gezitter,
Vitriolkalkbrie ging nämlich kaputt beim‘e Gewitter.
Enaus in die Wingert is mer dann gefahr met Gaul, Ochs ore Kuh,
was war des noch ne idyllische Ruh.

Wer ko Fuhrwerk hatt war fascht genauso froh,
der hot mit de Fra un de Kinner des Handweelche' gezoo.
Drauß gings dann noch emol richtig los,
es fiel werklisch nix in de Schoß.

Feldbereinichung war noch net do,
uff de merschte Plätz kon Weg gezo.
Do honn de Jab, Philipp un de Scho,
die Spritzbrie als 300 bis 400 Meter weit getro.

Ja, so oofach un doch so schwer wars manchmol er Leit,
awer ons steht fescht, mer hat noch Zeit.
Trotz Vitriol hat mer noch Stielkrankheit dabei,
do hot mer Schmeersaaf dezu genomm und die Traube ware gesund und frei.

In de Zwanziger Johre war dann werre e Neubeginn,
Batterie-Spritze kame, 17 Liter ginge e ninn,
war die dann noemm spritze leer,
aach ohne Brie war se fascht genauso schwer.

Uffem Waa met Eiserad hot mer ne Kolwebump befestigt
un des Spritzfaß dann devor,
bis mer die Spritz mit de Hand vollgebumpt hat
hot mer net gefror.

Denoo hon dann verschiedene met Preßluft¬spritze
die Brie enaus gebrong,
do kame ach 17 Liter enin un de Druck
hot mer dorch Preßluftflasche gewonn.

Manche harres met de Zeit noch leichter,
es gab ach mehr Krach do devor,
mer füllte die Batterie-Spritze
am Waa met emme Saxmotor.

1934 war bei uns die Feldbereinichung do,
mer hot viele Ecke grad gemacht un überall We gezo.
Im Krieg gabs met de Brie fertig se mache koo Plag,
die Genossenschaft installierte an de Weed ne Spritz¬brie-Olag.

Mer konnt dort nor noch fülle,
es war alles bereit,
nor stande damals vel Fraae alo do
un harre ko Leit.

In de Fuchzicher kame Spriegeräte met Motore,
eerscht for uff de Buckel, dann ach fahrbar,
un so is mer dann met Spriewolke und Rumore,
dorch die einzelneReihe gefahr.

Met de Spriegeräte war ach nei Spritzpulver im Oogebot,
vun Ofang wuschte die Winzer sich gar kon Root.
Vitriol-Kalkbrie se spritze hot sich met de Zeit verlor
un mer zog die moderne Weißspritzmittel vor.

Weißspritzmittel gabs dann wie Sand am Meer,
die Fabriken stellte dann unzählige Gifte zum Spriehe bereit.
Trotzdem werre bis heit die Schädlinge immer mehr,
ohne Bekämpfung wäre mer vielleicht genauso weit.

Die Spritz-Olag an de Weed muscht dann weiche,
denn die Weißspritzmittel konnt sich jeder selber oteiche.
Die Winzer Ofang de Siebziger Johre
ware fortschrittlich un ginge weirer met’m Moore.

Schmalspurschlepper schaffte sich Oner no dem Anere oo,
hinne baut mer sich Geräte un ach ne Spritz dro.
Los gings dann mit so manchem Fabrikat, daß is kon Witz,
es ging beim spritze dorch die Wingertsreihe wie de Blitz.

Im Rheingau sogar un in so manche annere Gebiete,
hot merr noch was Neieress erfunn, fascht eine Zierde.
Körperlich brauch mer sich garnet mer se bemühe,
do lossese die Spritzbrie met dem Hubschrauber sprühe.

Ja, so isses halt im Leewe Nacht und Tag,
Nix ist ohne Arwet, Mieh und Plag.
Je moderner umm so hektischer wärd die Zeit,
was wars doch vor 90 Johr so idyllisch un ruhig er Leit.

Erich Mörbel