Die Dorfschelle

Nummer 17 - Ausgabe Dezember 1999

De Wingertschitz

Am Sundaachmoje treffe sich in der Wertschaft "Bei der Gret"
de Bolemoschter Heinerich un sei Gemonerät.
De Herbscht der steht jetzt vor der Deer,drei Woche noh der Kerb,
un war aachs Wetter bisher schee, die Trauwe werre merb.

Ob mer mit de Les beginne soll, dass wird sich heit entscheide.
Wie se aach ausgeht die Geschicht, s soll koner Schade leide.
Winzermoschter Kall der säht "Die Trauwe bleiwe hänge,
jeeder Daach bringt Qualität, ich peif eich uf die Menge".

De Jab sieht das ganz annrschter,er säht: "In ganz Rhei'hesse
gibt‘s Stare widder masseweis, die duh uns alles fresse".
Un aach die Fritz meld sich zu Wort: "Es faule schon die Stiel,
das bißje Sunn am Nohmiddaach, bringt uns net meh viel".

So geht's e Zeitlang hie un her, bis mer am Newedisch
de Wingertschitz, de Schoo, entdeckt, do säht de Heinerich:
"Du hockst do in de Wertschaft rum, duhst saufe un krageele,
do kann jo drauß in der Gemaak jeder die Trauwe stehle".

"Ach was", säht dodrufhie de Schoo, un duht am Peifche kaue,
"ihr seid jo allminanner do, wer soll dann ebbes klaue?"

Albert Hey