Die Dorfschelle

Nummer 21 - Ausgabe Dezember 2003

Maschinefiewer

Die Dreschmaschin is in der Gass,
se kimmt in jedes Haus
un mit ehr aach de Staab un Dreck -
in unserm Hof siehts aus!
Des Stroh leit iwwerall erum,
die Sprau werd fortgeblos
un flieht dorchs halwe Örtche ball,
bis in die hinnerscht Stroß.
Kaum daß die Maschin gerickt,
steh' aach schon owedruf
de Schmitte Kall, de Becker Franz
un schneid Garwe uf.
An der Sprau do schafft de Jab,
er kimmt kaum zur Ruh,
un aach am Stroh beim Schorch, beim Hans
gibts allerhand se duh.
An de Säck, wie jedes Johr,
de Hewwel un de Petter,
am Ofang, wies noch langsam lääft,
redde se iwwers Wetter.
Doch ball schon misse dann die Zwaa
ganz geheerig schleppe.
E Mallersack hot sei Gewicht
uf dene steile Treppe.
Zwelf Mann hoch is die Helferschar
ko oner is zuviel,
jeder steht uf seinem Platz
un schafft in dem Gewihl.
De Opa hot des Kriggelche
un gibt de Leit se trinke.
Kaum hot er vorne ingeschenkt,
duh se schon hinne winke.

Maschinefehrer is de Fritz
vom Unnerort do drauß,
der macht das seit Johre schon
un kennt sich prima aus.
Helfe duht ehm dodebei,
jetzt aach schon siwwe Johr,
de Phillip aus der Kerchegass,
die Zwaa versteh sich klor.
Schon widder is de Opa do
for Haustrunk inseschenke.
Ko Wunner, bei dem viele Staab
do muß mer grindlich schwenke.
Is dann die letzt Garb dorchgeschluppt,
uf em Speicher sin die Säck,
hockt mer noch in der gure Stubb,
vergeß ist Staab un Dreck.
Was schmeckt de Krumbeerbrei so gut,
des Raicherfleich uns Kraut,
wie mer geschafft hot iwwer Daach
so werd aach jetzt gekaut.
Wer flott im schaffe, säht mer joh,
der leert aach rasch sei Deller.
De Opa kimmt dann noch emol,
bringt Gure aus em Keller.
Vom klone Fässje heelt er jetzt,
das wo ganz hinne leit -
do werd jo sunscht nit dro gelangt,
das is e Ausnahm heit.
Drei Gläser trinkt de Jab noch aus
bis sich sei Zung verknoddelt,
er hot e feierrote Kopp,
verdreht die Aa's un toddelt.
Ganz besorgt de Opa fräht:
"Is ders nit gut, mei Liewer?"
"Loß en ganz geh", säht do de Kall,
"der hots Maschinefiewer".

A. Hey